Экспедиций гыч увер…

Марий кугыжаныш университет пеленысе «Воскресение» отрядын кычалшыже (поисковик)-влак Ленинград областьысе Киров район Гайтолово ял кундемыште Кугу Отечественный сар годымсо кредалме верлаште кычалме пашам умбакыже эртарат. Ме нунын дене кылым кучена, увер-влакым тыланда палдарена.
Ӱдыр-рвезе-влак возат:

«28 апрель. Лагерьым тичмашнек шогалтенна. Пашам ыштена. Теҥгече икымше салтакым муынна. Таче кокымшо салтакын лулегыжым верештынна, тудым мланде гыч луктынна. Капше кредалмаш годым окопын тӱжвал велышкыже (брустверыш) лектын возын улмаш. Кычал мумо салтак-влакын пеленышт нимогай возман арвер лийын огыл.

Игече пеҥгыдылыкнам терга – лум лумеш. Но ме умбакыже кычалына. Ӱшанена, лишыл жапыште йӱдвел кече мемнам шке чеверже дене куандара.

29 апрель. Жап вашке кая. Экспедицийын «экваторжат» эртыш. Эше икмыняр салтакым муынна. Чылаже ынде вич еҥ. Чаманен каласаш логалеш, кызытеш нунын лӱмышт пале огыл.

Таче тыгак «Невский пятачокышто» Ленинград областьысе «Вахта памяти-2021» пайремлын почылтын. Тушто Ленинград областьыште кызыт кычалме пашам шуктышо отрядла гыч еҥ-шамыч миеныт. Тыгак Российысе поисковой движенийын секретарьже Елена Цунаева, Ленинград областьысе виктемын председательже Владимир Цой, ты областьысе ветеран-влакын да мер ушем-шамычын еҥышт лийыныт. Мемнан отряд гычат кумытын миеныт.

Игече мыняр-гынат левештыш. Йӱрат, лумат эртышт, кече ончале. Пашам ышташ куштылгырак.

30 апрель. Кычалме пашанам шуена. Тыште, очыни, танк дене кредалмаш лийын. Моткоч шуко танкысе ӱзгар, броня-влак лектедат. Кызыт мемнан тӱшкаште 12 еҥ тырша. Верысе поисковик-влакат полшат. Умбакыже увер-влакым палдараш тӱҥалына…»

«Воскресение» студент-влакын кычалше отрядын командиржын алмаштышыже Николай Сергеев.
Авторын да «Воскресение» отрядын сайтше гыч налме фото-влак.